Haakon Olsen Wika () var ein norsk gardbrukar, byråkrat og politikar frå Vega kommune i Nordland, som 1937-49 representerte Arbeidarpartiet på Stortinget.
Wika var son til ein gardbrukar og fiskar. Sjølv dreiv han fiske frå 1913 til -20. Der etter gjekk han Volda middelskule 1920/21 og Treiders handelsskule i Oslo 1923. Sidan var han gardbrukar heime på Vega og tidvis både likningssekretær, formannskapssekretær, forretningsførar i Vega trygdekasse og frå 1925 til 1938 heradskasserar i Vega.
Frå 1929 var Wika medlem i kommunestyret i Vega, ordførar 1948-65. Han var stortingsrepresentant frå Nordland for Arbeidarpartiet 1937-49. På Stortinget var han perioden 1945-49 medlem i Administrasjonskomiteen. Dei to åra 1964-65 var han ordførar for fylkestinget i Nordland. Elles var han medlem i Sosiallovkomiteen av 1937 og Brannlovkomiteen av 1947. Han var òg styremedlem 1961-72 i Naturskadefondet.
Wika var mykje interessert i historie og skreiv mellom anna tre band Vega bygdebok som kom ut i tida 1961–77. Han vart i 1976 tildelt Nordland fylkes kulturpris.
Kjelder Stortingsbiografi
Kategori:Stortingsrepresentantar for Nordland Kategori:Stortingsrepresentantar frå Ap Kategori:Stortingsrepresentantar 1937-1945 Kategori:Stortingsrepresentantar 1945-1949 Kategori:Ordførarar i Vega Kategori:Ap-ordførarar i Nordland Kategori:Fylkesordførarar i Nordland Kategori:Fylkesordførarar frå Ap Kategori:Norske lokalhistorikarar Kategori:Folk frå Vega